Tá scéal an-mhór againn daoibh an mí seo, a chairde.  Ní amháin go bhfuil muid gníomhach ag obair go dian ar chlár foilsitheoireachta Futa Fata 2021 ach tá muid ag obair go treán freisin ar chlár foilsitheoireachta Barzaz! Agus céard é Barzaz?! Bhuel! Sin inphrionta nua dár gcuid, áit a mbeidh muid ag foilsiú litríocht chomhaimseartha do dhaoine fasta i nGaeilge.  Tá sé i gceist againn dhá leabhar a fhoilsiú an Fómhar seo. Is úrscéal nuascríofa é an chéad cheann, scríofa ag Tadhg Mac Dhonnagáin.  In ainneoin go bhfuil taithí leathan ag Tadhg mar scríbhneoir don scáileán agus mar údar do pháistí, seo é an chéad uair aige úrscéal do dhaoine fásta a scríobh.  Beidh ríméad air agus orainn Madame Lazare a chur faoi bhur mbráid faoi cheann cúpla mí.  Scéal é faoi bheirt bhan Ghiúdacha: Levana, múinteoir Francach sna fichidí, agus an bhean a thóg í, Hana, a seanmháthair. Ar feadh a hóige ar fad, thug Hana le fios do Levana nach raibh sí ag iarraidh labhairt faoina hóige i dtuaisceart na hEorpa ná faoina muintir ar fad a cuireadh chun báis sa Shoah. Ach i ndeireadh a saoil, agus a hintinn ag teip ar Hana, sceitheann blúirí eolais uaithi a thugann le fios do Levana nach Giúdach Eastónach í a seanmháthair, ach duine de chúlra Éireannach…

Aistriúchán ar úrscéal comhaimseartha Fraincise atá sa dara leabhar. Is í Máirín Nic Con Iomaire atá ag cur Gaeilge ar Khalil faoi láthair agus beidh an leabhar sin ar fáil san Fhómhar. Is féidir Barzaz a leanacht ar na meáin shóisialta @Barzaz_ie le haghaidh tuilleadh eolais, dataí foilseacháin agus an nuacht is deanaí ar fad.  Dúshlán nua atá ann agus beidh go leor le foghlaim againn, ach tá muid ag súil go mór le tabhairt faoi.